Month: 2024 جولائی

حضور صلی اللہ علیہ وسلم نے حضرت ماریہ قبطیہ رضی اللہ عنہا سے عقد فرما کر اپنی ازواج میں شامل فرمایا۔ باقی ازواج کی طرح اُن سے بھی پردہ کروایا اور اُن کی تعلیم تربیت پر خصوصی توجہ فرمائی ۔ آنحضرت صلی اللہ علیہ وآلہ وسلم نے ابتداء میں انہیں مسجد کے قریب حارثہ بن نعمان رضی اللہ عنہ کے گھر میں رکھا لیکن بعد میں مدینہ کے نواح میں ایک کھجور کے باغ میں ٹھہرایا ۔ آنحضور صلی اللہ علیہ وسلم نے بعد میں وہ باغ حضرت ماریہ قبطیہؓ کو عطا فرما دیا تھا ۔
(طبقات الکبریٰ جلد8صفحہ 212)

حضرت عائشہؓ بیان فرماتی ہیں کہ حضرت اُمِّ کلثومؓ کی شادی کے موقع پر حضور صلی اللہ علیہ وسلم نے اپنی خادمہ اُمّ ایمنؓ سے فرمایا کہ میری بیٹی کو تیار کرو اور اسے دلہن بنا کر عثمانؓ کے پاس لے جاؤ اور اس کے آگے دف بجاتی جانا، چنانچہ اس نے ایسا ہی کیا۔
(الکامل لابن عدی جلد5صفحہ 134بیروت)

حضرت رقیہؓ بنت محمدؐ وہ پہلی خاتون ہیں جنہوں نے اللہ کی راہ میں سب سے پہلے مکہ سے حبشہ ہجرت کی۔ آنحضرت صلی اللہ علیہ وسلم نے آپؓ کی حبشہ ہجرت پر فرمایا ’’ابراہیم اور لوط کے بعد عثمان پہلے شخص ہیں جنہوں نے خدا کی راہ میں اپنی بیوی کے ساتھ ہجرت کی۔‘‘
(ابنِ عساکرجلد3صفحہ 150بیروت)

آنحضور صلی اللہ علیہ وسلم حضرت زینبؓ کے بارے میں فرمایا کرتے تھے
’’ ھِیَ اَفْضَلُ بَنَاتِیْ اُصِیْبَتْ فِیَّ‘‘
یعنی یہ میری بیٹیوں میں سب سے افضل ہے کیونکہ اس کو میری وجہ سے بہت تکالیف پہنچی ہیں۔
(تاریخ الصغیر لامام بخاری جلد1صفحہ34)

محرم الحرام سے متعلق تقاریر کی تیاری  میں آنحضرت صلی اللہ علیہ وسلم کی ازواج مطہرات اور اولاد مبارکہ کے متعلق تقاریر تیار ہونی شروع ہوئیں  جو اب کتابی شکل میں ہدیہ قارئین ہے۔ ”مشاہدات“  کی  یہ گیارہویں  کاوش ہے۔ اللہ تعالیٰ ہماری حقیر کوششوں  کو قبول فرمائے اور اہلِ بیتِ رسولؐ  سے محبت اور عقیدت بڑھانے کا موجب ہو ۔آمین

شامی فوج کے قریب جاکر حضرت امام حسین رضی اللہ عنہ نے بطور اتمام حجت فرمایا:
” لوگو! میرے نسب پر غور کرو میں کون ہوں؟ پھر اپنے گریبان میں منہ ڈال کر اپنے آپ کو ملامت کرو خیال کرو کہ میرا قتل اور میری آبرو ریزی تمہارے لئے زیبا ہے کہ کیامیں تمہارے نبی کی بیٹی کا بیٹا نہیں ہوں؟کیا تم کو معلوم نہیں کہ رسول اللہ صلی اللہ علیہ وسلم نے میرے اور میرے بھائی کے متعلق فرمایا تھا کہ یہ جنت کے سردار ہوں گے۔ خدا کی قسم! آج مشرق سے لے کر مغرب میں روئے زمین پر تم میں اور کسی غیر قوم میں بھی میرے سوا کسی نبی کا نواسہ موجود نہیں۔ مجھے بتاؤ کہ تم لوگ میرے خون کے کیوں خواست گار ہو؟ کیا میں نے کسی کا قتل کیا ہے، کسی کا مال لوٹا ہے؟ کسی کو زخمی کیا ہے؟ تمہی لوگوں نے مجھے بلایا تھا۔ لوگو! تم پر میرا آنا ناگوار ہے تو مجھے چھوڑ دو تاکہ میں کسی پُرامن خطہ کی طرف چلاجاؤں‘‘

حضورصلی اللہ علیہ وسلم نے فرمایا کہ
’’میرا بیٹا حسنؓ سردار ہے۔ امید ہے کہ اللہ تعالیٰ اس کے ذریعے مسلمانوں کی دو بڑی جماعتوں کے درمیان صلح کرائے گا۔ ‘‘
( صحیح بخاری کتاب الصلح باب قول النبیؐ للحسن )

حضورصلی اللہ علیہ وسلم نے فرمایا کہ
’’ وہ ہم میں سے نہیں جو (مصیبت کے وقت) چہرے کو پیٹے ، گریبان کو پھاڑے اور جاہلیت جیسا واویلا اور نوحہ کرے ۔“
(بخاری)